شكلها زعلانة منك

المشهد الأول

داخل سيارة على كوبري السادس من أكتوبر – نهاراً
الشخصيات
عمر: رجل في أوائل الأربعينات من الطبقة المتوسطة في مقعد السائق
أحمد: صديق عمر من نفس الطبقة والعمر في المقعد المجاور

عمر: يعني بعد كل دا تتطلع زعلانة مني عشان سيبتها شوية...طاب بزمتك دا تفسير منطقي؟...وبعدين ما أنا رجعت بعد شهر ولاقيتها قافشة عليّا

أحمد: مع إنها كان المفروض تكون ارتاحت منك ومن قرفك يا أخي

عمر (سارحاً): فاكر أول مرة شوفتها. الكل حذرني منها. وقاعدوا يقولوا هي جميلة آه بس مش حتستحمل معاملتك

أحمد: آه فاكر طبعاً...بس ما تنكرش إنها ماكلفتكش حاجة تقريباً

عمر: على رأيك مهرها كان لا يُذكر أصلا. أبويا يوميها قالي أتكل على الله، على البركة

أحمد: من ساعتها وهي دراعك اليمين معاك على طول، على الحلوة والمرة

عمر: ما هو دا اللي خلاني أبعد شوية كنت عايز أرجع لأيام الحرية والتنطيط من حتة لحتة. زهقت منها ومن قاعدتي على قلبها طول الوقت واعتمادي عليها في الكبيرة والصغيرة. وافتكرتها هي كمان زهقت وبدل ما ترتاح مني وتعيش حياتها شوية اتقمصت وزي ما يكون جالها اكتئاب

أحمد (ساخراً): ولمّا هي جالها اكتئاب، أنت بقى ارتحت منها ولا وحشتك ولا أيه!!!

عمر: يا أخي بتتريق على أيه بس؟...على فكرة رغم الحرية اللي حسيت بيها، من غيرها كنت تايه. أصلها تعرف عني كل حاجة...اللي بحبه واللي ما بحبوش...الأماكن اللي بحب أروحا والأمكان التقيلة على قلبي...الأغاني اللي بحبها والكتب اللي بقراها...دا حتى لبسي، دايما جاهرة بالجاكيت المناسب للجو المناسب

أحمد (متفهماً): آه ما هي عشرة عمر

عمر (بنبرة تحمل جدية): أنت بتقول فيها! بجد هي فعلاً عشرة عمر. استحملتني سنين وعمرها ما اعترضت لا على أصحابي وغلاستهم ولا أغانيا العجيبة ولا حتى الفوضى اللي أنا عايش فيها. اتحملت قلة أدبي وشتايمي.
ولا لمّا يجي آخر الشهر وأنا ما فيش في جيبي ولا مليم ماتفهمش أزاي عمرها ما كسفتني! ولا عمرها قالت لي كفاية عليك لحد هنا

أحمد: طيب يا سيدي صالحها بقى وخدها على إسكندرية

عمرة: بكرة بالليل في الروائة كدا إن شاء الله

المشهد الثاني

داخل السيارة على كورنيش ستانلي – فجراً

الشخصيات:

عمر

زيزي: سيدة في أواخر الثلاثينات، متوسطة الجمال ولا تضع أي مساحيق تجميل

في الخلفية نسمع أغنية فايزة أحمد "هدي الليل"

عمر (مستفهماً): أيه يا ستي بقى مالك! ليه زعلانة مني؟ أنا بس قولت أريحك مني شوية

زيزي (مستنكرة): تريحني منك ولا ترتاح مني!

عمر (محاولاً تهدئة الوضع): يا ستي نرتاح من بعض شوية. يعني بزمتك مزهقتيش مني؟

زيزي: عايز الحق؟ لأ...عمري ما زهقت...عارف أول مرة شوفتك فيها كنت متأكدة أنك قدري وأني حكون ليك...ما عرفش مجرد إحساس!!!

عمر: يا سلام! أنا كمان جالي نفس الإحساس

زيزي (مبتسمة): وكنت متأكدة برضو أني مش الأولنية في حياتك...في اللي عرفتها واللي عاشرتها واللي خرجت معاها...بس كنت متأكدة إني الأولنية اللي ليك بجد...في الأول عاملتني بحنية لغاية ما خلتني أخد على وجودك...(تخفت الابتسامة)... عشت معاك فرحك وحزنك...نجاحك وفشلك... قسيت عليا كذا مرة...واستحملت لأني بحبك وعارفة أنه زي ما بتفرحني لازم حيبقى ليك هفواتك حتى لو بتيجي عليّا

عمر (مدافعاً): أنا مقدّر وفاهم طبعاً كل اللي قولتيه، بس أنتي برضو يعني ليكي حركات مش ظريفة قوي يعني

زيزي (بنبرة دافئة تحمل تحدي): عارف مشكلتك أيه؟! مشكلتك أنك فاهم أنك فاهم كل حاجة ومتحكم في كل حاجة... فاكر يوم ما نكدت عليك ووفقت لك علشان متروحش المشوار اللي كنت رايحه، كنت عارفة أنك رايح تقابلها...واتحملت غرمياتك وحركاتك وماعترضش...لأنك بترجع لي في الأخر...لكن المرة دي كنت عارفة كويس إن البنت دي بالذات بتستغلك

عمر (منكراً): بنت أيه اللي بتكلمي عليها؟

زيزي (متجاهلةً تعليق عمر لتستكمل حديثها): ولا السنة اللي فاتت لما فصلت الكهربا...أيوة أنا اللي فصلتها وأنا اللي رجعتها...عارف ليه؟...لإنك لما سبت صحابك ونزلت تجيب سجاير قاعدوا يلعبوا في ورقك ويسبوا ويلعنوا فيك من ورا ضهرك وانت فاكرهم الصحاب الطيبين بتوع زمان...لمّا رجعت خليتهم ينزلوا يشوفوا لهم حاجة تانية على ما تحل مشكلة الكهربا...وكل مرة بعكنن عليك لما تجيبهم، على أمل إنك تتشائم منهم بقى.

عمر (مذهولاً): وأنتي أزاي عرفتي كل دا؟ معقول يطلع منك كل دا؟

زيزي: ماتستألش بيا. أنا أقدر على حاجات كتير. عارف كل دا ولا فرق معايا...أنت جرحتني فعلاً وخليتني أخد منك موقف بجد لمّا سبتني ولا سألت فيا...كل ليلة كنت بستناك بس تعدي تطمن عليا ومابتعديش...قعدت اسأل نفسي هو أنا قصرت معاك في أيه ومن أمتى وأنا حمل عليك كدا...ماتخيلتش أبداً أنك تتخلى عني كدا

ينظر عمر لزيزي نظرة ندم، بينما تستمر أغنية فايزة أحمد

المشهد الثالث

داخل السيارة على كورنيش ستانلي– مع طلوع النهار

الشخصيات:

عمر

أمين شرطة في أواخر العشرينات

مازالت أغنية فايزة أحمد "هدي الليل" في الخلفية

عمر نائماً في السيارة، أمين الشرطة يطرق على زجاج السيارة ليوقظه

أمين الشرطة: أصحى يا عم، أصحى يا سيدي، أصحى يا باشا!

في تلك الأثناء يستيقظ عمر فاركاً عيناه وينظر إلى جانبه الأيمن فلا يجد أحداً. وينظر إلى الجانب الآخر فيرى الأمين وينزل زجاج السيارة.

أمين الشرطة: دا برضو كلام توقف بعربيتك كدا على الكوبري وتنام كمان؟...هي المدام طرداك ولا أيه؟

عمر: معلش يا سيادة الأمين أصل العربية كان بقالها شهر ما تحركتش وما كنتش راضيه تمشي. ولمّا وديتها للميكانيكي...

أمين الشرطة: أنت حتحكيلي قصة حياتك؟؟

عمر: الخلاصة أني كان لازم أخدها مشوار طويل علشان تلين تاني...أنا أصلي جي من مصر

أمين الشرطة: يا عم وأنا مالي. أديك حتتاخد مخالفة، أمشي بقى من هنا ولا تحب اكلبشهالك وماتقوملهاش قومة؟!

عمر يخرج 50 جنياً من جيبه ويأخذ سيجارة من علبة السجائر ويعطيهما لأمين الشرطة

عمر: خليها عليّا المرة دي.

أمين الشرطة: ماشي يا سيدي. بس أمشي يلا من هنا. النهار طالع والناس كلها نازلة على أكل عيشها

عمر: طيب ممكن بس ألمع العربية الأول

أمين الشرطة (ضاحاً بسخرية): دي شكلها غالية عليك قوي...والحلوة اسمها أيه بقى؟

عمر (جاداً): أنا اللي غالي عليها ومستهلهاش كمان

أمين الشرطة (ساخراً): لا يا شيخ!!!! ربنا يخليكوا لبعض...(يبدأ في السير بعيداً)

عمر: طاب على فكرة اسمها عزيزة وبدلعها زيزي

أمين الشرطة (يستكمل سيره مهمهماً): لا واللهي؟! أما المجانين في نعيم صحيح (ضارباً كف على كف)

يقوم عمر بتلميع العربية مردداً الكوبليه الأخير من أغنية فايزة أحمد

تاخدنا الليالى فى رحلة بعاد

ونشتاق ويغلب علينا العناد

ويحتاروا فينا وفى اللى جرالنا

لا ضحكة بنضحك ولا نوم يجيلنا

وفجأة نلاقينا رجعنا لروحنا

مفيش غير لقانا يطيب جروحنا

واقابلك وننسى ان بينا عتاب

ويرجع هوانا وعمره ما غاب

مشاهد مستوحاة من كتاب إذاعة الأغاني للكاتب عمر طاهر، فصل فايزة أحمد "هدى الليل".

خواطر حول أفراح القبة

سرحان الهلالي

شخصية سرحان الهلالي شخصية مدير المسرح الذي يمسك بجميع الخيوط ويتلاعب بها في كل الاتجاهات. هو فعلا رب المسرح كل من فيه عرائس ماريونيت في يده، سواء أظهروا اعتراضهم أو لم يظهروه، انقطعوا عن العمل أو لم ينقطعوا، كل ما يريد سرحان هو ما يتم في النهاية. هو الاشرس شراً رغم هدوء انفعالاته وبروده في الكثير من المواقف مقارنة ببقية الشخصيات. خدع الجميع وتلاعب بحياتهم وأحلامهم والعجيب أن الكل لم يفكر في الخروج من كنفه وهم على علم بأن الغدر من طبعه. طارق قَبل أن يظل كومبارس لأن سرحان لا يراه يصلح لأدوار البطولة. كرم بعد أن وعده سرحان بأن يجعله مؤلفاً جعله ملقناً رغم اقتناعه بموهبته. حتى ابن كرم يعرض على سرحان مسرحياته وكأنه الوحيد الذي يمكن أن يعطيه رأياً سديداً. مع العلم إن رأي سرحان بهم جميعاً كان واحداً للتقليل من قدرهم.

 ما هو سر اهتمامهم برأي سرحان فقط وتوجيهاته ؟؟؟؟. كان من الأجدى الذهاب إلى مدير مسرح آخر. كما كانوا جميعاً يقولون "شارع عماد الدين مليان مسارح".

قد يكون ذلك رمزاً لفكرة القطيع. القطيع يمشي وراء الراعي حتى لو كان ظالم. 

في رأيي سرحان أكثر الشخصيات شراً حتى اكتر من بدرية وفتنة. هو الشرير الذي يعرف مفاتيح ونقاط ضعف ضحاياه. ولم يظهر في المسلسل كيف تحولت شخصيته مثل باقي الأشخاص. هو فعلاً مثل الذئب، يبدو طيباً وديعاً حتى يجد اللحظة المناسبة لينقض على فريسته ليسلبها إرادتها ويبقيها تحت قبة مسرحه بشروطه. 

في مفارقة قاسية نجد أن سرحان أجبر كل الممثلين على تمثيل أفراح القبة رغم قسوتها عليهم لأنها تمثيل صريح لحياتهم، في حين كرم يونس في الماضي عرض عليه رواية فتنة التي تحكي أيضا حياة سرحان شخصيا لكنه رفضها. رفض سرحان أن يرى قصة حياته في أضعف مراحلها وفرض على الجميع أن يروا بل ويعيشوا من جديد حياتهم في أسوء مراحلها. والغريب أنهم قبلوا بذلك. كم هو صعب أن يعيد الإنسان تجرع مأساته وإخفاقاته ومواجهة نفسه وهو يعلم ما سوف تؤول إليه!

فتنة

 

كندة علوش في دور فتنة مفاجأة، الدور مغاير تماما لطبيعة أدوارها المعتادة. أثبتت فعلا إنها ممثلة محترفة وليست مجرد مجيدة وحافظة لأدوار الطيبة والبراءة. لعبت دور الشرير الذي يجعلك رغم عنك تتعاطف معه حينما ترى مصيره. دور لم يتجاوز 5 حلقات ولكن تأثيره كان تأثير أدوار البطولة.

في إحدى الحلقات سألت فتنة كرم يونس "انت كنت ايه قبل ما تدخل المسرح وبقيت ايه بعد كدة". في إشارة لها إن المسرح هو الدوامة أو المتاهة التي حينما تدخلها تبدأ الصراعات والمؤامرات والشر وتتحول الشخصيات في سعي منها لتبلغ قمة المسرح وهو "قبة المسرح". فكرم يونس رغم ثقة فتنه به تآمر مع طارق وسرحان للتخلص منها، رغم برائته عندما دخل المسرح لأول مرة ودموعه البريئة التي جعلت فتنة تنجذب له.

تصوري عن الرمز الذي يحمله اسم الرواية

كما قالت فتنة إن الحاجة الوحيدة النظيفة هي الفن الذي يحدث تحت قبة المسرح. لكن وراء الكواليس غيلان تنهش بعضها البعض. ومن خلال أحداث المسلسل للأسف حتى قبة المسرح شهدت أيضا تلوثاً فنياً في فترة سنية.

اعتقد إن كواليس المسرح هي رمز للحياة التي يدخلها الإنسان بريئاً مثلما حدث مع كرم يونس وابنه عباس وغيرهم وتخطفه أضواء كواليس وخشبة المسرح وقبته هي الغاية والهدف الذي يبذل في سبيله كل شيء؛ هو اختباره الحقيقي ماذا سيفعل حتى يبلغها؟ ماذا سيخسر؟ هل سيخسر مبادئه؟ هل سيخسر نفسه؟ للأسف كل الشخصيات خسرت نفسها ومبادئها في سبيل بلوغ أفراح القبة. فرح النجاح تحت قبة المسرح.


قرأت الرواية قبل مشاهدة المسلسل وأقر وأعترف إن المسلسل أقوى من الرواية. استطاع المخرج محمد ياسين والسيناريست نشوى زايد أن يضيفا عمقاً لعمق الرواية الأصلية مع الاحتفاظ بأجواء ونكهة نجيب محفوظ. من يشاهد العمل يعتقد إنه مأخوذ من الرواية بكل تفاصيله لكن في الحقيقة المسلسل أضاف بعداً وعمقاً لشخصيات الرواية الأصلية كما أضاف شخصيات أخرى أكثر تأثيراً في الأحداث مثل شخصية بدرية وبناتها سنية وعلية وأشرف شبندي زوج سنية وأبيهم عبده وكذلك، شخصية فتنة وبدرية. ناهينا عن الإبداع في الديكور والتتر والأزياء والموسيقى التصويرية. هذا العمل ممتع بكل المقاييس، يجمع بين متعة العقل والوجدان في كل مشهد.

روابط نقدية:

بكل المقاييس أفراح القبة...كامل الأوصاف!

CINEMATOLOGY: أفراح القبة (المسرح...مراية)

#أفراح_القبة #سرحان_الهلالي #فتنة #سوسن_بدر #صبري_فواز #محمد_الشرنوبي #عباس_كرم_يونس #كرم_يونس #محمد_الشرنوبي #نجيب_محفوظ #محمد_ياسين